iQOO 10 Pro ចេញផ្លូវការក្នុងនាមជាទូរសព្ទមានកម្លាំងសាកថ្មដល់ 200W ដំបូងគេ
ដោយ​ ៖ ខេមបូរីផត | 3 សប្ដាហ៍មុន SHARE

 

កាលពីពេលថ្មីៗនេះ iQOO ដែលជាយីហោមួយទៀតរបស់ vivo នោះ បានប្រកាសចេញទូរសព្ទលំដាប់កំពូលថ្មីមួយឈ្មោះថា​ iQOO 10 Pro ហើយនេះជាក៏ម៉ូឌែលដំបូងគេ ដែលទទួលបានកម្លាំងសាកថ្មតាមខ្សែខ្ពស់បំផុតដល់ទៅ 200W ទៀតផង។

iQOO 10 Pro បានបំពាក់មកជាមួយអេក្រង់ទំហំ 6.78 អ៊ីញ ជាប្រភេទ AMOLED ជំនាន់ថ្មី E5 មានកម្រិតបង្ហាញ 1,440 x 3,200 ភិចសែល ហើយក៏មានល្បឿន Refresh Rate ដែលអាចឆ្លាស់ឡើងបានខ្ពស់បំផុតដល់ 120Hz ផងដែរ។ វាក៏មានបំពាក់មកជាមួយឈីបកំពូល Snapdragon 8 Plus Gen 1 ព្រមទាំងមានជម្រើសរ៉េម 8GB និង 12GB ជាមួយជម្រើសអង្គផ្ទុក 256GB ឬ 512GB។ ទន្ទឹមគ្នានេះ វាក៏បានបំពាក់ឈីប vivo V1+ មកដែរ ដែលត្រូវបានក្រុមហ៊ុនគេអះអាងថា នឹងចូលមកជួយពង្រឹងទៅលើ Frame Rate ក្នុងហ្គេមឲ្យដំណើរការបានកាន់តែប្រសើរ។

សម្រាប់ផ្នែកកាមេរ៉ាវាបានបំពាក់ចំនួន 3 គ្រាប់ ដោយមានលេនគោលទំហំ 50MP មានបំពាក់មកជាមួយបច្ចេកវិទ្យាទប់លំនឹងបែប Gimbal ក៏ដូចជាគាំទ្រការថតវីដេអូ 8K, លេនទូលាយ Ultrawide 150 ដឺក្រេ មានទំហំ 50MP និងមួយគ្រាប់ទៀតនោះទំហំ 14.6MP ជាលេន Telephotos 3X ផងដែរ។ ចំណែកនៅខាងមុខ វាមានបំពាក់មកមួយគ្រាប់ទំហំ 16MP។ កញ្ចប់កាមេរ៉ារបស់ iQOO 10 Pro ក៏ទទួលបានជំនួយពីឈីបផ្ទាល់ខ្លួន vivo V1+ ដូចគ្នា ដោយឈីបនេះនឹងជួយទៅលើការគណនារូបភាពផ្សេងៗ។

iQOO 10 Pro បានប្រើប្រាស់ថាមពលថ្មទំហំ 4,700mAh ជាមួយបច្ចេកវិទ្យាចែកថ្មជាពីរផ្នែក ដែលជាបច្ចេកវិទ្យាសំខាន់មួយ អនុញ្ញាតឲ្យ vivo អាចដាក់ឲ្យទូរសព្ទម៉ូឌែលថ្មីនេះគាំទ្រកម្លាំងសាកខ្ពស់បំផុតបានដល់ទៅ 200W តែម្ដង។ វាក៏គាំទ្រមុខងារសាកថ្មឥតខ្សែបានក្នុងកម្លាំង 50W ហើយមុខងារផ្ទេរថាមពលថ្មទៅកាន់ឧបករណ៍ដទៃ ក៏មានមកដូចគ្នាដែរ។

គួរបញ្ជាក់ដែរថា iQOO 10 Pro ពេលនេះកំពុងតែត្រូវបានគេបើកឲ្យធ្វើការកុម្ម៉ង់ទិញហើយ ជាមួយតម្លៃចាប់ផ្តើមឡើងពី 740 ដុល្លារ សម្រាប់ទីផ្សារប្រទេសចិន។

ប្រភព ៖ GSMarena
អត្ថបទទាក់ទង