ប្រព័ន្ធប្រតិបតិ្តការ iOS / iPadOS 14 ដែលបានប្រកាសចេញជាផ្លូវការ កាលពីចុងខែមិថុនា ឆ្នាំ 2020 កន្លងទៅ ក៏ដូចជាកំពុងតែដាក់ឲ្យប្រើនៅលើ iPhone និង iPad ក្នុងពេលបច្ចុប្បន្ននេះ បានភ្ជាប់មកជាមួយមុខងារថ្មីៗជាច្រើន ហើយក្នុងចំណោមនោះ ក៏មាន Picture-in-Picture (PiP) ដែលទទួលបានការស្វាគមន៍យ៉ាងច្រើនពីសំណាក់អ្នកប្រើ iPhone និង iPad ផងដែរ។ គួរបញ្ជាក់ផងថា PiP អនុញ្ញាតឲ្យអ្នកប្រើប្រាស់ iPhone និង iPad អាចធ្វើការទស្សនាវីដេអូបណ្តើរ និងប្រើប្រាស់កម្មវិធីផ្សេងទៀតបណ្តើរ នៅក្នុងពេលតែមួយ។

កាលពីដាក់ឲ្យប្រើសាកល្បងដំបូង YouTube អនុញ្ញាតឲ្យអ្នកប្រើ iPhone និង iPad ដើរដោយ iOS / iPadOS 14 អាចដំណើរការមុខងារ PiP តាមរយៈកម្មវិធី Safari បាន ប៉ុន្តែនៅពេលដែល iOS / iPadOS 14 ត្រូវបានដាក់ឲ្យប្រើប្រាស់ជាផ្លូវការនោះ អ្នកប្រើប្រាស់កត់សម្គាល់ឃើញថា នៅពេលដែលពួកគេបើកគេហទំព័រ YouTube តាមរយៈកម្មវិធី Safari មុខងារ PiP មិនដំណើរការនោះទេ។ យ៉ាងណាមិញ ក្រោយមកទៀត YouTube បានអនុញ្ញាតឲ្យមុខងារ PiP ដំណើរការនៅលើកម្មវិធី Safari វិញ ប៉ុន្តែមិនបានប៉ុន្មាន YouTube ក៏លែងអនុញ្ញាតឲ្យមុខងារ PiP ដំណើរការលើកម្មវិធី Safari សាជាថ្មីម្តងទៀត រហូតទល់មកដល់សព្វថ្ងៃនេះ។ ដោយឡែក ថ្មីៗនេះ យើងបានរកឃើញកម្មវិធីមួយ ដែលអាចធ្វើឲ្យ iPhone និង iPad ដើរដោយ iOS / iPadOS 14 ឡើងទៅ អាចដំណើរការមុខងារ PiP សម្រាប់ YouTube ដោយមិនចាំបាច់ធ្វើការ Jailbreak នោះទេ។ អញ្ចឹងកុំឲ្យខាតពេលយូរ យើងនាំគ្នាទៅស្គាល់ពីឈ្មោះកម្មវិធី និងរបៀបប្រើប្រាស់របស់វាទាំងអស់គ្នា។