អ្នកគាំទ្រហ្គេមប្រភេទ MOBA ដែលមានឈ្មោះល្បីល្បាញថា WarCraft III: The Frozen Throne រហូតដល់ DOTA និង DOTA 2 ក្នុងពេលបច្ចុប្បន្ននេះ ប្រាកដជាធ្លាប់បានទស្សនាខ្សែភាពយន្ដ ទាក់ទងទៅនឹងតួអង្គរបស់ហ្គេមនេះ ពីមុនៗរួចមកហើយ។ ឈានមកដល់ពេលឆាប់ៗខាងមុខនេះ Valve បានចាប់ដៃគូជាមួយ Netflix វិញម្ដង ដើម្បីធ្វើការចាក់បញ្ចាំងខ្សែភាពយន្ដថ្មី DOTA: Dragon’s Blood បែបលក្ខណៈគំនូរជីវចល Anime ទៅលើសេវាកម្មរបស់ខ្លួន។

បើយោងតាមវីដេអូឈុតខ្លី ត្រូវបានបង្ហោះនៅលើឆានែល YouTube របស់ Netflix ផ្ទាល់តែម្ដង បានលេងឲ្យឃើញអំពី សាច់រឿងរបស់តួអង្គក្នុងហ្គេមឈ្មោះថា Davion (Dragon Knight) និងបានលើកឡើងឈ្មោះរបស់ព្រះនាង Mirana  (Princess of the Moon) ជាតួអង្គក្នុងហ្គេមមួយទៀតដែរ។ ស្របនឹងពេលធ្វើការទស្សនាខ្សែភាពយន្ដ DOTA: Dragon’s Blood នោះយើងនឹងអាចដឹងអំពី ដំណើរផ្សងព្រេងរបស់លោក Davion ជាមួយឈុតឆាតវាយប្រហារ ដែលគាត់បានជួបប្រទះនៅតាមផ្លូវ ដូចដាក់បង្ហាញនៅក្នុងវីដេអូ Trailer ខ្លីនៅខាងក្រោមនេះ។ សម្រាប់ការស្វែងយល់កានតែច្បាស់បន្ដិចទៀត អ្នកទាំងអស់គ្នា អាចធ្វើការចុចលើវីដេអូខាងក្រោមនេះ ដើម្បីទស្សនាឈុតខ្លីរបស់រឿងនេះ ជាមុនសិនបាន។

ប្រសិនបើអ្នកទាំងអស់គ្នា ជាអ្នកដែលតែងតែគាំទ្រ និងតាមដានសាច់រឿងរបស់តួអង្គ DOTA គឺអាចរង់ចាំបន្ដការទស្សនា ខ្សែភាពយន្ដថ្មីមួយទៀតនេះ តាមរយៈសេវាកម្ម Netflix នៅក្នុងថ្ងៃទី 25 ខែមីនា ឆ្នាំ 2021 វេលាម៉ោង 2PM នៃប្រទេសយើង។