ចំពោះអ្នកនិយមគំាំទ្រ និងអ្នកតាមដានព័ត៌មាននានា ដែលមានទាក់ទងជាមួយ Apple ប្រាកដជាដឹងរួចមកហើយថា Apple កំពុងតែរៀបចំគម្រោងសម្ងាត់ ដើម្បីផលិតរថយន្ដអគ្គិសនី បើកបរខ្លួនឯងដោយស្វ័យប្រវត្តិ ព្រមទាំងអាចនាំដៃគូជាមួយ Hyundai/KIA ថែមទៀតផង។ យ៉ាងណាក៏ដោយ បើយោងតាមដំណឹងថ្មីមួយទៀត ទើបរាយការណ៍ចេញពី សារព័ត៌មាន Bloomberg កាលពីពេលថ្មីៗនេះ គឺមានចង្អុលបង្ហាញឲ្យដឹងថា Apple បែរជាកំពុងតែផ្អាកការពិភាក្សាជាមួយ Hyundai/KIA ទៅវិញ។

គម្រោងសម្ងាត់របស់ Apple មួយនេះ ត្រូវបានប្រភពផ្ទៃប្រទះឃើញ ចាប់ផ្ដើមអភិវឌ្ឍន៍ជាបណ្ដើរៗ អស់រយៈពេលប៉ុន្មានឆ្នាំមកហើយដែរ ដោយឡែក ទើបកាលពីប៉ុន្មានខែមុននេះ បានមានដំណឹងលេចឮថា ពួកគេកំពុងសហការជាមួយ Hyundai/KIA ដើម្បីជួយចូលរួមពង្រឹងបន្ថែម លើមុខងារបើកបរដោយស្វ័យប្រវត្តិ ជាលក្ខណៈពេញលេញតែម្ដង។ ឈានមកដល់ពេលនេះ Apple ហាក់បីដូចជា ចង់ផ្អាកលើការពិភាក្សាវិញសិន ដោយមិនដឹងពីមូលហេតុច្បាស់ ហើយយើងក៏មិនទាន់ដឹងថា ពួកគេនឹងបន្ដសហការជាមួយគ្នា ក្នុងពេលអនាគតទៀត ឬក៏អត់នៅឡើយដែរ។ ចំណែកឯពីមុនៗមក គឺមានប្រភពផ្ទៃក្នុងមួយចំនួន ធ្លាប់បានលើកឡើងមកថា Apple ទំនងជាចង់វិនិយោគខ្ទង់ 3.6 ពាន់លានដុល្លារ ជាមួយ Hyundai/KIA ដើម្បីឲ្យផលិតរថយន្តឲ្យខ្លួនខ្ទង់ 10 ម៉ឺនគ្រឿងក្នុងមួយឆ្នាំ នៃដំណាក់កាលដំបូង ចាប់ពីអំឡុងឆ្នាំ 2024 តទៅ ប៉ុន្ដែអាចនឹងប្រែប្រួលវិញក៏ថាបាន។

អ៊ីចឹង រៀងរាល់ដំណឹងលេចឮទាំងប៉ុន្មាន ដែលយើងទទួលបាន កាលពីពេលមុនៗមក អាចប្រហែលជាធ្វើឲ្យ Apple មិនសូវសប្បាយចិត្ត ដោយសារតែ ពួកគេខំលាក់គម្រោងសម្ងាត់មួយនេះ អស់រយៈពេលយូរណាស់មកហើយ ប៉ុន្ដែចុងក្រោយ ក៏ត្រូវបែកធ្លាយអស់ដដែល។ បើចាប់តាំងពីដើមមក Apple តែងតែបដិសេធរហូត ក្រោយពីមានអ្នកសារព័ត៌មាន សួរសំណួរទាក់ទងទៅនឹង ការអភិវឌ្ឍន៍រថយន្ដអគ្គិសនី បើកបរដោយស្វ័យប្រវត្តិនោះ។