កាលពីថ្ងៃចូលឆ្នាំសកល មានអ្នកប្រើ WhatsApp ដើម្បីធ្វើការខលដល់ទៅខ្ទង់ 1.4 ពាន់លានដងឯណោះ​
ដោយ​ ៖ ឡេង | 1 ខែមុន SHARE

 

ជាការពិតណាស់ ដោយសារតែវីរុសកូវីដ-19 នៅកំពុងតែរីករាលដាល ទូទាំងពិភពលោកដដែល ទើបធ្វើឲ្យប្រជាជននៅក្នុងប្រទេសមួយចំនួន មិនអាចជួបជុំក្រុមគ្រួសាររបស់ពួកគេបានទេ គឺមានតែវិធីសាស្រ្ដទំនាក់ទំនង តាមប្រព័ន្ធអនឡាញប៉ុណ្ណោះ។ ហេតុដូច្នេះហើយ កម្មវិធីផ្ញើសារដ៏ល្បីល្បាញ WhatsApp ប្រទះឃើញទទួលបានចំនួនខលសរុបរហូតដល់ទៅខ្ទង់ 1.4 ពាន់លានដងឯណោះ នៅក្នុងអំឡុងថ្ងៃចូលឆ្នាំសកលកន្លងទៅនេះ។

បើយោងតាមសេចក្ដីប្រកាសជាផ្លូវការដោយ Facebook បានបញ្ជាក់ឲ្យដឹងថា ទាំងអស់នោះគឺជាចំនួនបូករួមទាំង ការខលជាសំឡេង និងការខលជាវីដេអូ ពីអ្នកប្រើប្រាស់ទូទាំងពិភពលោក ដែលមានចំនួនខលច្រើនបំផុត ក្នុងរយៈពេលត្រឹមតែមួយថ្ងៃ ហើយមិនធ្លាប់កើតឡើងពីមុនមក សម្រាប់ WhatsApp នោះទេ។ ប្រសិនបើធ្វើការប្រៀបធៀបទៅឆ្នាំមុន និងនៅក្នុងថ្ងៃចូលឆ្នាំសកលដូចគ្នានេះ គឺមានចំនួនកើនឡើងប្រមាណខ្ទង់ 50% គួរសមដែរ ដោយសារតែ មានមនុស្សនៅឆ្ងាយពីគ្នាច្រើនជាងមុន។

លើសពីនេះ Facebook ក៏បានលើកឡើងមកថា អ្នកប្រើប្រាស់មុខងារ Instagram Live និង Facebook Live ដើម្បីធ្វើការផ្សាយបន្ដផ្ទាល់នៅក្នុងថ្ងៃពិសេសនោះ គឺមានចំនួនច្រើនជាង 55 លានគណនីផងដែរ។ ចំណែកឯមុខ AR Effects ដែលពេញនិយមជាងគេនៅលើ Messenger ក្នុងខណៈពេលចូលឆ្នាំថ្មីនេះ គឺបានទៅលើរូប 2020 Fireworks តែម្ដង។

ទោះបីជាប្រទេសយើងមិនសូវជា មានចំនួនអ្នកឆ្លងវីរុសកូវីដ-19 ច្រើនក៏ពិតមែន ប៉ុន្ដែប្រទេសផ្សេងៗដទៃទៀត នៅបន្ដកើនឡើងឥតឈប់ឈរដដែល ហាក់បីដូចជា តំបន់អឺរ៉ុប និងសហរដ្ឋអាមេរិក ជាដើម។ យ៉ាងណាក៏ដោយ ចំនួនអ្នកប្រើប្រាស់ប្រព័ន្ធអនឡាញ អាចនឹងចាប់ផ្ដើមធ្លាក់ចុះវិញ ក្រោយពីវ៉ាក់សាំងការពារវីរុសនេះ បានចាប់ផ្ដើមចែកចាយកាន់តែធំទូលាយទៅៗ ជាក់ជាមិនខានទេ។

ដោយ​ ៖ WhatsApp
អត្ថបទទាក់ទង