កម្មវិធី WhatsApp បានបញ្ចេញមុខងារ Dark Mode ដាក់អោយសាកល្បងប្រើលើ Android ហើយ​
ដោយ​ ៖ គង់គីត | 1 ខែមុន SHARE

 

ពេលកន្លងទៅនេះ ក្រុមការងារ Facebook បានចាប់ផ្ដើមខិតខំបន្ថែមមុខងារ Dark Mode ដែលធ្វើអោយផ្ទៃខាងក្រោយ ក្លាយទៅជាពណ៌ខ្មៅ ហើយជួយដល់ភ្នែករបស់ អ្នកប្រើប្រាស់ នៅពេលមើលកន្លែងងងឹត និងជួយសន្សំថាមពលថ្ម សម្រាប់បន្ទះអេក្រង់ OLED អោយកម្មវិធីរបស់ខ្លួន បានកាន់តែច្រើនទៀតហើយ។ កម្មវិធីបណ្ដាញសង្គម Instagram ទើបនឹងទទួលបាន មុខងារនេះនៅលើ iOS 13 ក្នុងថ្ងៃនេះតែម្ដង បន្ទាប់ពីកម្មវិធីផ្ញើសារ Messenger លេចចេញមុនដំបូងគេ កាលពីខែមីនា ឆ្នាំ 2019 កន្លងផុតទៅនេះ។ 

មិនទាន់អស់ត្រឹមនេះឡើយ ដោយរបាយការណ៍ថ្មីមួយ បានប្រទះឃើញមានមុខងារនេះ នៅលើកម្មវិធីផ្ញើសារ WhatsApp ជំនាន់ Beta ចុងក្រោយបង្អស់ ដែលកំពុងតែស្ថិតនៅក្នុង ការធ្វើតេស្ដសាកល្បង។ ជាក់ស្ដែង ប្រភពចែកចាយព័ត៌មាន ទាក់ទងទៅនឹងមុខងារ Dark Mode មាននៅលើកម្មវិធី WhatsApp ជំនាន់ Beta នេះ គឺត្រូវបានចេញមកពី គេហទំព័រ WABetaInfo កាលពីម្សិលមិញនេះ និងព្រមទាំងដាក់បង្ហាញអោយឃើញពីរូបភាព នៃការរចនាបថរបស់វា ផងដែរ។ ដូចដែលប្រិយមិត្តអ្នកអាន បានឃើញរូបភាពខាងក្រោមនេះ ដោយមុខងារ Dark Mode សម្រាប់ WhatsApp នេះ គឺមិនមែនប្រភេទ AMOLED ពណ៌ខ្មៅទាំងស្រុង ដូចមាននៅលើ Messenger និង Instagram នោះទេ ប៉ុន្ដែវាបានប្រើប្រាស់ ពណ៌ខៀវងងឹតដូចជា Twitter ទៅវិញ។ តាមរយៈអត្ថបទចុះផ្សាយដោយ WABetaInfo បានបញ្ជាក់ប្រាប់ថា WhatsApp នឹងធ្វើការបន្ថែមផ្ទាំង Theme ថ្មីមួយនៅក្នុងកន្លែង Settings ដែលអ្នកប្រើប្រាស់ទាំងអស់ អាចជ្រើសរើសប្រភេទ Light (ពណ៌សដូចដើម), Dark (ពណ៌ខៀវងងឹត) ឬក៏ Set by Battery Saver សម្រាប់ស្មាតហ្វូន Android។ ពិតប្រាកដណាស់ រូបភាពទាំងអស់នេះ បានបង្ហាញអោយឃើញថា មុខងារ Dark Mode ជិតរួចរាល់អស់ហើយ ដូច្នេះអាចសង្ឃឹមបានថា នឹងមកដល់ជំនាន់ផ្លូវការ ឆាប់ៗខាងមុខជាក់ជាមិនខាន។

បើប្រិយមិត្តទាំងអស់គ្នា មានចំណាប់អារម្មណ៍ចង់ បើកប្រើប្រាស់មុខងារថ្មីនេះ នៅលើកម្មវិធី WhatsApp គឺតម្រូវអាប់ដេតទៅកាន់ជំនាន់ 2.20.13 ដោយវាកំពុងស្ថិតនៅ ការធ្វើតេស្ដសិនប៉ុណ្ណោះ រីឯថ្ងៃដាក់បញ្ចេញជាផ្លូវការ ក៏គ្មានដំណឹងបញ្ជាក់ច្បាស់នោះទេ ប៉ុន្ដែសង្ឃឹមថាឆាប់ៗនេះហើយ។

ដោយ​ ៖ Phone Arena
អត្ថបទទាក់ទង