អ្នកលេងហ្គេម Overwatch ទទួលបានបច្ចេកវិទ្យា NVIDIA Reflex នៅលើកំណែអាប់ដេតថ្មីហើយ​
ដោយ​ ៖ ឡេង | 1 សប្តាហ៍មុន SHARE

 

មនុស្សមួយចំនួនប្រហែលជា មិនទាន់បានដឹងច្បាស់នៅឡើយទេថា រៀងរាល់ដែលយើងចុចគ្រាប់ Mouse ឬក៏ប៊ូតុងអ្វីមួយ នោះវាមិនផ្ទេរទិន្នន័យចូលទៅ កុំព្យូទ័ររបស់យើងភ្លាមៗនោះទេ ដោយតែងតែមានការយឺតយ៉ាវ ជាក់ជាមិនខានឡើយ។ ដោយសារតែ NVIDIA បានឃើញដូចនេះហើយ ទើបពួកគេបានបង្កើតបច្ចេកវិទ្យាថ្មីមួយ ដែលមានឈ្មោះហៅថា Reflex ដើម្បីជួយកាត់បន្ថយល្បឿនយឺតយ៉ាវ (Latency) ទាំងនោះ ហើយហ្គេម Overwatch ចាប់ផ្ដើមទទួលបានវា ក្នុងពេលបច្ចុប្បន្ននេះតែម្ដង។

បន្ទាប់ពីបានធ្វើតេស្ដ នៅជំនាន់សាកល្បង Public Test Region (PTR) អស់រយៈពេលជាង 3 សប្ដាហ៍មក ទីបំផុតបច្ចេកវិទ្យា NVIDIA Reflex បានបញ្ចេញឲ្យកំណែអាប់ដេតផ្លូវការ (Stable) សម្រាប់អ្នកលេងជាសាធារណៈហើយ។ ចំពោះអ្នកលេងហ្គេម Overwatch ដែលមានក្រាហ្វិកកាត NVIDIA GeForce GTX 900 Series ឡើងទៅ សុទ្ធតែអាចប្រើប្រាស់បច្ចេកវិទ្យា Reflex នេះបាន។

បើយោងតាមវីដេអូថ្មីមួយ ដែលស្ថិតនៅខាងក្រោមនេះ បានចង្អុលបង្ហាញឲ្យឃើញថា សម្រាប់អ្នកមានម៉ូនីទ័រ Refresh Rate កាន់តែខ្ពស់ និងមានបច្ចេកវិទ្យា G-SYNC មកជាមួយទៀត ដូច្នេះពួកគេអាចទទួលបាន លទ្ធផលកាន់តែល្អថែមទៀត។ ចំណែកឯការតេស្ដលើកមុន ក៏បានឲ្យយើងដឹងថា ក្រាហ្វិតកាតស៊េរីកាន់តែខ្ពស់ដូចជា RTX 3080 គឺអាចកាត់បន្ថយបានកាន់តែខ្លី ពីចំនួនខ្ទង់ 26ms ចុះមកខ្ទង់ 16ms វិញ។

ក្រោយពីបានធ្វើការអាប់ដេតហើយ អ្នកលេងហ្គេម Overwatch ទាំងអស់ ដែលមានលក្ខណៈសម្បត្តិកុំព្យូទ័រ ដូចបានបញ្ជាក់ពីខាងលើ គឺអាចចូលទៅកាន់ កម្មវិធី NVIDIA Game Ready Driver > ចុចលើ Overwatch > ចូលទៅកំណត់កន្លែងផ្នែក Display និងអាចឃើញមានជម្រើសបើក NVIDIA Reflex Low Latency បានហើយ។

ដោយ​ ៖ NVIDIA GeForce
អត្ថបទទាក់ទង