នេះជារូបភាពគំរូផ្លូវការរបស់ទូរសព្ទហ្គេមជំនាន់ថ្មី ASUS ROG Phone 5​
ដោយ​ ៖ ឈីរ៉ូ | 5 ថ្ងៃមុន SHARE

 

កាលពីចុងសប្តាហ៍មុន ASUS បានបញ្ជាក់ឲ្យយើងដឹងថា ទូរសព្ទហ្គេមជំនាន់ថ្មីរបស់ពួកគេនឹងមានឈ្មោះជាផ្លូវការហៅថា ROG Phone 5។ ជាមួយគ្នានោះ តាមរយៈគេហទំព័រផ្លូវការរបស់ ASUS ក៏បានធ្វើឲ្យយើងដឹងផងដែរថា ROG Phone 5 នឹងត្រូវប្រកាសចេញជាផ្លូវការ នៅថ្ងៃទី 10 ខែមីនា ឆ្នាំ 2021 នេះ។ ដោយឡែកនៅក្នុងថ្ងៃនេះវិញ យើងបានប្រទះឃើញរូបភាពគំរូផ្លូវការរបស់ ASUS ROG Phone 5 ជាលើកដំបូង។

ជាការពិតណាស់ តាមរយៈគេហទំព័រ DxOMark យើងបានប្រទះឃើញរូបភាពគំរូ ដែលបង្ហាញពីរចនាបថរូបរាងផ្លូវការរបស់ ASUS ROG Phone ជាលើកដំបូង។ ផ្អែកទៅលើរូបភាពគំរូផ្លូវការរបស់ ROG Phone 5 បានធ្វើឲ្យយើងដឹងថា ផ្នែកខាងមុខរបស់ ROG Phone 5 មិនសូវជាមានភាពខុសប្លែកពីជំនាន់មុនរបស់វាប៉ុន្មាននោះទេ។ ដោយវានៅតែភ្ជាប់មកជាមួយអេក្រង់ដែលមានគែមខាងលើ និងខាងក្រោមស្មើគ្នាដដែល។ អ្វីដែលខុសគ្នានោះគួរឲ្យកត់សម្គាល់នោះគឺស្ថិតនៅត្រង់រចនាបថកាណុងកាមេរ៉ា ក៏ដូចជាស្តាយឆ្នូតអូសកាត់នៅលើខ្នងខាងក្រោយរបស់វាតែម្តង។ ជាមួយគ្នានេះដែរ យើងក៏សង្កេតឃើញថា ROG Phone 5 ទទួលបានប៊ូតុងពណ៌ក្រហមថ្មីមួយស្ថិតនៅជ្រុងខាងស្តាំ ផ្នែកខាងក្រោមនៃតួខ្លួនរបស់ផងដែរ ហើយវាត្រូវបានគេសង្ស័យថាគឺជាប៊ូតុងសម្រាប់ដំណើរការមុខងារ Game Mode។ លើសពីនេះ នៅខ្នងខាងក្រោយរបស់ ROG Phone 5 ក៏ឃើញមានភ្ជាប់មកជាមួយ LED តូចៗ (LED Dot-Matrix) និងអេក្រង់តូចមួយប្រើសម្រាប់បង្ហាញព័ត៌មានផ្សេងៗថែមទៀតផង។

តាមរយៈប្រភពខាងលើដដែលនេះ ក៏បានធ្វើឲ្យយើងបានដឹងបន្ថែមទៀតថា ទូរសព្ទហ្គេមជំនាន់ថ្មី ROG Phone 5 ទទួលបានពិន្ទុពីការធ្វើតេស្តផ្នែកសម្លេងដល់ទៅ 79 ឯណោះ ហើយវាក៏ជាពិន្ទុដែលខ្ពស់ជាងគេបំផុតក្នុងតារាងរបស់ DxOMark សម្រាប់ពេលបច្ចុប្បន្ននេះផងដែរ។ ទៅលើលក្ខណៈសម្បត្តិ Hardware វិញ  ASUS ROG Phone 5 នឹងប្រើប្រាស់បន្ទះឈីបលំដាប់កំពូល Snapdragon 888 ទំហំ 5nm គួបផ្សំជាមួយជម្រើស RAM ទំហំ 16GB និងជម្រើសអង្គផ្ទុកទិន្នន័យទំហំ 512GB ផងដែរ។ លើសពីនេះ វាក៏អាចនឹងបំពាក់មកជាមួយអេក្រង់ទំហំ 6.78 អ៊ីញ ប្រភេទ OLED ក៏ដូចជាមានថាមពលថ្មទំហំ 6,000mAh និងអាចគាំទ្របច្ចេកវិទ្យាសាកថ្មល្បឿនលឿនកម្លាំង 65W ថែមទៀតផង។

ដោយ​ ៖ DxOMark
អត្ថបទទាក់ទង