CAMBO REPORT

Popup Advertising5 seconds

Adobe Premiere Pro បន្ថែមមុខងារថ្មី Auto Reframe សម្រាប់ជួយដល់ការផ្លាស់ប្តូរទម្រង់របស់វីដេអូ

តាមដានព័ត៌មានផ្សេងៗពី CAMBO REPORT

 

បើសិនប្រិយមិត្ត ជាអ្នកដែលជាអ្នកធ្វើការខាងកាត់ត វីដេអូ នោះប្រាកដជាស្គាល់កម្មវិធីមួយដ៏ល្បីល្បាញ ដែលមានឈ្មោះថា Adobe Premiere Pro ច្បាស់ជាមិនខានឡើយ។ វាគឺជាកម្មវិធីមួយ ដែលគេប្រើប្រាស់ សម្រាប់កាត់ត វីដេអូ បែបលក្ខណៈ Professional ហើយកម្មវិធីនេះត្រូវបាន បង្កើតឡើង ដោយក្រុមហ៊ុន Adobe។ អ្វីដែលគួរឲ្យកត់សម្គាល់នោះគឺកម្មវិធីនេះទទួលបានការគាំទ្រយ៉ាង ខ្លាំងពីសំណាក់អ្នកប្រើ ជាពិសេសអ្នកដែលធ្វើការពាក់ព័ន្ធទៅនឹងការកាត់ត វីដេអូតែម្តង។ ព្រោះថាកម្មវិធីនេះទទួលបានកំណែ អាប់ដេត ពីមួយជំនាន់ទៅមួយជំនាន់ ដែលនាំយកសុទ្ធតែមុខងារល្អៗ និងមានអត្ថប្រយោជន៍ជាច្រើនសម្រាប់អ្នកប្រើប្រាស់។


ជាក់ស្តែងកាលពីពេលថ្មីៗនេះ ក្រុមហ៊ុន Adobe បានដាក់បង្ហាញមុខងារថ្មីមួយ ដែលត្រៀមនឹងបង្ហាញខ្លួននៅក្នុងកម្មវិធី Adobe Premiere Pro ហើយវាមានឈ្មោះថា Auto Reframe។ Auto Reframe គឺជាមុខងារមួយ ដែលជួយសម្រួលទៅដល់ការកែប្រែ កម្រិតសមាមាត្ររបស់វីដេអូ ដោយធ្វើការចាប់យកផ្នែកសំខាន់នៃវីដេអូ រួចធ្វើការកែប្រែឲ្យស៊ីទៅនឹងកម្រិតសមាមាត្រដែលអ្នកបាន ធ្វើការកំណត់ ឧទាហរណ៍ដូចជាពី ជ្រុង ទៅបញ្ឈរ, ពីបញ្ឈរទៅជាខ្នាតកុន 16:9 ជាដើម។ និយាយដល់ចំនុចនេះប្រាកដជាមាន ប្រិយមិត្តមួយចំនួនមានការងើងឆ្ងល់ហើយថា តើធ្វើយ៉ាងណាទើបមុខងារ Auto Reframe អាចដឹងថាផ្នែកមួយណានៃវីដេអូគឺជា ផ្នែកសំខាន់។ ដើម្បីដឹងថាផ្នែកមួយណាគឺជាផ្នែកសំខាន់ នៃវីដេអូរបស់អ្នក គឺវាពឹងផ្អែកលើបច្ចេកវិទ្យា AI និង Machine Learning របស់ក្រុមហ៊ុន Adobe ដែលមានឈ្មោះថា Adobe Sensei។ អ្វីដែលពិសេសនោះគឺអ្នកអាចធ្វើការកំណត់មុខងារ Auto Reframe សម្រាប់វីដេអូមួយ ឬច្រើនក៏បាន ដោយគ្រាន់តែកំណត់តែម្តងបានគ្រប់វីដេអូទាំងអស់ ដូច្នេះអ្នកមិនចាំបាច់ចំណាយពេលក្នុងការ កំណត់ម្តង 1 វីដេអូ ម្តង 1 វីដេអូនោះទេ។

 


គួរបញ្ជាក់ផងថា ក្រុមហ៊ុន Adobe មិនបានបញ្ជាក់អំពីថ្ងៃច្បាស់លាស់នៃការដាក់មុខងារ Auto Reframe ទៅក្នុងកម្មវិធី Adobe Premiere Pro នោះទេ។ ប៉ុន្តែពួកគេបានសន្យាថាមុខងារនេះ នៅបង្ហាញខ្លួនជាផ្លូវការ នៅចុងឆ្នាំនេះ សម្រាប់ Adobe Premiere Pro នៅលើប្រតិបត្តិការ MacOS ។ អញ្ចឹងសរុបមកវិញ នេះគឺជាដំណឹងដ៏ល្អមួយ ស្រាប់អ្នកធ្វើការខាងកាត់ត វីដេអូ និងជាពិសេស អ្នកដែលជា Content Creators ដែលត្រូវការវីដេអូក្នុងលក្ខណៈបញ្ឈរសម្រាប់ផុសនៅក្នុងបណ្តាញសង្គម Instagram និងវីដេអូ ក្នុងលក្ខណៈផ្តេកសម្រាប់ផុសនៅក្នុងគេហទំព័រ YouTube។

 


***សូមទស្សនាវីដេអូខាងក្រោម

 

 

 


***សូមចុចទីនេះ ដើម្បី Subscribe YouTube Channel របស់ ខេមបូរីផត ដើម្បីទទួលបាន វីដេអូថ្មីៗ!!!


ដោយ: Chiro ថ្ងៃទី ១៤ ខែ កញ្ញា ឆ្នាំ ២០១៩
ប្រភព: 9To5Mac Tag: កម្មវិធី-ហ្គេម