មកដល់ចុងឆ្នាំ 2018 នេះ យើងសង្កេតឃើញថាទីផ្សារ SSD គឺមានការធ្លាក់ចុះហើយ មានន័យថាវាមិនសូវ​ជាមាន​តម្លៃ​ថ្លៃ​ដូច​កាល​ពី 2-3 ឆ្នាំមុននោះទេ ដែលទីផ្សារ SSD គឺថ្លៃទាល់តែមែនទែន បើចង់ទិញ SSD មកប្រើប្រាស់ជំនួស Hard Disk Drive វិញ គឺ​យើង​​អាចទិញ Hard Disk បាន 5-6 គ្រាប់ ទើបទិញបាន SSD មួយគ្រាប់។ ការធ្លាក់ចុះទីផ្សារនេះគឺ​ជា​ដំណឹងល្អបំផុត​សម្រាប់​អ្នក​ប្រាស់​កុំព្យូទ័រ ព្រោះអ្នកអាចធ្វើការ Upgrade នូវអង្គផ្ទុកទិន្នន័យរបស់ពួកគេឲ្យដំណើរការបានរហ័សជាងមុន ស៊ីភ្លើងតិចជាងមុន ថែម​ទាំង​មានសុវត្ថិភាពជាងមុនផងដែរ។

ជាក់ស្ដែងក្រុមហ៊ុនអេឡិចត្រូនិ Samsung កាលពីម្សិលមិញនេះបានប្រកាសចេញជាផ្លូវការនូវ SSD ស៊េរីថ្មីមួយទៀតរបស់ខ្លួន ដែល​វា​មានឈ្មោះថ្មី មិនស្ថិតក្រោយខ្សែស្រឡាយ Pro ឬ Evo ឡើយ ដោយជំនួសមកវិញជាមួយពាក្យហៅថា QVO វិញម្ដង ជា​ប្រភេទ Sata SSD មានទំហំ 2.5 អ៊ីញ អាចយកទៅតម្លើង ប្រើប្រាស់បាននៅលើម៉ាស៊ីន Laptop និង Desktop ភាគច្រើន​នៅ​ពេល​បច្ចុប្បន្ន លើកលែងតែម៉ាស៊ីនស្ដើងៗ ជាប្រភេទ Ultrabook ដែលត្រូវប្រើប្រាស់ SSD ពពួក M.2។ Samsung QVO 860 ប្រើប្រាស់បច្ចេកវិទ្យា MLC (Multi-Level Cell) កម្រិត 4-bit នៅលើបន្ទះឈីបមេម៉ូរីជាប្រភេទ V-NAND គ្រប់គ្រងដោយឈីប MJX SSD Controller សម្រាប់ធ្វើឲ្យវាអាចយកទៅប្រើប្រាស់បានរាប់សិបឆ្នាំ ដោយគ្មានបញ្ហា តែដោយសារតែវាមិនមែនជាប្រភេទ SSD ល្បឿនលឿនដូច M.2 NVMe នោះ វានៅតែមានល្បឿនប្រហាក់ប្រហែលទៅនឹង SSD 2.5 ផ្សេងៗទៀតអញ្ចឹងដែរ ជាមួយ​នឹង​ល្បឿន៖

•    ល្បឿន Read ខ្ពស់បំផុត 550MB/s

•    ល្បឿន Write ខ្ពស់បំផុត 520MB/s

សាកសមសម្រាប់អ្នកដែលចង់ធ្វើការ Upgrade ផ្នែករឹង ជុំវិញការរក្សាទិន្នន័យ រក្សាឯកសារធំៗដូចជា File វីដេអូកម្រិត 4K ឬរក្សា​ហ្គេម​ជាដើម ជាជាងទិញវាទុកដាក់ Boot Windows ព្រោះ 860 QVO មានតែ 3 ជម្រើសប៉ុណ្ណោះសម្រាប់ទំហំផ្ទុកដូចជា 1TB, 2TB និងលោតធំបំផុត 4TB។ តែបើអ្នកចង់យកវាដាក់ Boot Windows ក៏បាន ដោយបែកចែកវាចេញជា 2 Drives ដូចជា Hard Disk ទៅគឺបានហើយ!

ក្រុមហ៊ុន Samsung នឹងបញ្ចេញ SSD 860 QVO នេះលក់នៅក្នុងទីផ្សារជាផ្លូវការនៅខែធ្នូ ចុងឆ្នាំ 2018 នេះតទៅហើយ ដោយវា​មាន​តម្លៃ USD 149.99 (ទីផ្សារអន្តរជាតិ) សម្រាប់ទំហំ 1TB រីឯទំហំ 4TB តម្លៃប្រហាក់ប្រហែល USD 599.99 ជាមួយនឹង​ការ​ធានា​ដល់​ទៅ 3 ឆ្នាំពីក្រុមហ៊ុនផ្ទាល់។ ហេតុនេះសម្រាប់ប្រិយមិត្ត ដែលកំពុងមានគម្រោងធ្វើការ Upgrade ផ្នែកផ្ទុកទិន្នន័យ ដោយ​មិន​ចង់​ប្រើប្រាស់ Hard Disk ទៀតនោះ 860 QVO អាចកត់ចូលបញ្ជីរបស់អ្នកបាន ព្រោះបើធៀបទៅនឹង SSD ទំហំ 1TB នៅក្នុង​ទីផ្សារ​ស្រុក​ខ្មែរបច្ចុប្បន្ន ក៏មានតម្លៃថ្លៃផងដែរ ខណៈពេលដែលអ្នកអាចទិញ Hard Disk ទំហំ 1TB នៅពេលនេះ ជាមួយនឹងម៉ាក​ល្បីក្នុងតម្លៃចន្លោះពី USD 40 ទៅ USD 60 អាស្រ័យតាមម៉ាក និងម៉ូឌែល!