កាលពីសប្តាហ៍មុន យើងបានចុះផ្សាយនូវព័ត៌មាន​មួយ ដែល​បាន​បង្ហាញ​ពី​ Facebook ដែល​គ្រោង​បញ្ចេញ មុខងារ Remove ដល់​អ្នក​ប្រើ​ប្រាស់ Facebook Messenger ដោយ​វា​អនុញ្ញាត​អោយ​អ្នក​ប្រើ​អាច​លុបសារ ដែលបានផ្ញើចេញទៅ មិនអោយ​អ្នក​ដែល​ទទួល​សារនោះ បានឃើញឡើយ។ ចំពោះរយៈពេល នៃសុពលភាព គឺត្រឹមតែ 10 នាទី ប៉ុណ្ណោះ មានន័យថា ក្នុងអំឡុងពេល 10 នាទី ដែលសារនោះបានផ្ញើ គឺអ្នកផ្ញើទៅ អាចលុបបាន ទាំងសងខាង តែបើលើស 10 នាទី គឺមិនអាចលុបបាន ទៀតទេ។

ឥលូវនេះ យើងក៏ទទួលបានដំណឹងល្អមួយ សម្រាប់ចែករំលែក នឹងបង្ហាញដល់ប្រិយមិត្តអ្នកអានទាំងអស់គ្នា សារជាថ្មី គឺថាមុខងារ Remove ដែលវាមានតួនាទី អាចអោយអ្នកលុបសារ ដែលអ្នកបានផ្ញើរចេញ មិនអោយអ្នកដែលទទួលសារបានឃើញ ក្នុងកម្មវិធី Facebook Messenger នោះ ពេលនេះ ត្រូវបានក្រុមហ៊ុន Facebook ទម្លាក់ចេញហើយ។ ពិតមែនហើយ សម្រាប់មុខងារលុបសារ​នេះ ត្រូវបានដំណើការលើគណនីមួយចំនួនហើយ ហើយវាក៏កំពុងធ្លាក់ជាបន្តបន្ទាប់ សម្រាប់គណនីជាច្រើនទៀត នៅតាមតំបន់ ឬប្រទេសជាច្រើន ដើម្បីទទួលបានចំនុចពិសេសនេះ ផងដែរ។

អញ្ចឹង នេះគឺជាដំណឹងល្អ សម្រាប់អោយអ្នកប្រើ កម្មវិធី Facebook Messenger នេះ អាចលុបសារ ដែលផ្ញើចេញរួចបានភ្លាមៗ មិន​អោយអ្នកទទួលឃើញ ក្នុងអំឡុងពេល 10 នាទី ដូចជានៅពេលដែលយើង ផ្ញើសារខុស ឬច្រលំមនុស្សនោះ ជាដើម។

គួររំលឹកបន្តិចថា៖ មុខងារលុបសារនេះ មិនមែនទើបតែមាននៅលើកម្មវិធី Facebook Messenger នោះទេ ដោយវាត្រូវបាន​ប្រើ​ប្រាស់ នៅ​​លើ​កម្មវិធី Telegram, Viber និង WhatsApp ជាយូរម​ក​ហើយ។ យ៉ាងណា ត្រូវចាំថាមុខងារនេះ មានសុពលភាព​ត្រឹម​តែ 10 នាទីប៉ុណ្ណោះ លើសពីនេះ គឺមិនអាចស្រោចស្រង់បានឡើយ។