មាននាក់លេងហ្គេមនៅលើម៉ាស៊ីន Console ដែលរួមមានដូចជា Xbox និង PS4 មិនតិចនោះទេ ដែលចង់លេង​ហ្គេម​ដោយ​ប្រើប្រាស់​ក្ដារ​ចុច (Keyboard) និង Mouse សម្រាប់ហ្គេមមួយចំនួន ដូចជាពពួកហ្គេមបាញ់គ្នាជាដើម ជាជាងចុច​បញ្ជា​ដោយ​ប្រើ​ដៃ Controller ព្រោះវាមិនសូវស្រួល ថែមទាំងមិនទទួលបានបទពិសោធន៍ពេញលេញ ដូចទៅនឹងអ្នកលេងហ្គេមនៅ​លើ​ម៉ាស៊ីន​កុំព្យូទ័រ​នោះ​ទេ។ ជាក់ស្ដែង Microsoft បានធ្វើការលើគម្រោងនាំយកក្ដារចុច និង Mouse ចូលមកម៉ាស៊ីន Xbox បានមួយរយៈហើយ តែ​គម្រោង​នោះនៅមិនទាន់ដំណើរការ ដូចការរំពឹងទុកនោះទេ តែមកដល់ពេលនេះ ក៏មានដំណឹងលេចឮមកថា Microsoft បានចាប់​ដៃ​សហការណ៍​ជាមួយ​នឹង Razer ក្នុងការនាំយកក្ដារចុច និង Mouse ចូលទីផ្សារ Xbox ហើយ។

ដោយមានកិច្ចសហការណ៍ជាមួយក្រុមហ៊ុន Razer គម្រោងនាំក្ដារចុច និង Mouse យកមកលេងនៅលើម៉ាស៊ីនហ្គេម Xbox នឹង​ជិត​​ប្រកាស​ចេញជាផ្លូវការហើយ ដោយក្នុងនោះក្ដារចុច Razer នឹងអាចលេងហ្គេមជាមួយនឹងម៉ាស៊ីន Xbox បានដូច​ទៅ​នឹង​ម៉ាស៊ីន​កុំព្យូទ័រ​ដែរ ជាមួយនឹងភ្លើង RGB Chroma ដ៏កប់ស៊េរី ដែលអនុញ្ញាតឲ្យអ្នកប្រើប្រាស់ធ្វើការដាក់ភ្លើងពណ៌តាមចិត្តចង់ និង​មុខ​ងារ​ដាក់ភ្លើងលោតតាមហ្គេមទៀតផង ដូចជាហ្គេម OverWatch ជាដើម។ យ៉ាងណាក៏ដោយសម្រាប់ គម្រោងជាក់ច្បាស់ថាតើ Razer និង Microsoft នឹងបើកឲ្យម្ចាស់ម៉ាស៊ីន Xbox ទាំងអស់ អាចប្រើក្ដារចុច និង Mouse លេង​ហ្គេម​បាន​ជាផ្លូវ​ការ​នៅ​ពេល​ណា​នោះ នៅមិនទាន់ច្បាស់នៅឡើយទេ តែវាក៏ជាដំណឹងដ៏ល្អមួយផងដែរ ព្រោះបើលេងហ្គេមប្រើក្ដារចុច និង Mouse វានឹងផ្លាស់​ប្ដូរ​បទ​ពិសោធន៍​បាញ់ហ្គេមកប់ស៊េរីតែម្ដង។

ជាមួយនឹងកំណែ Update នូវ Firmware ថ្មី Microsoft នឹងបើកសិទ្ធិឲ្យម៉ាស៊ីនហ្គេម​របស់ខ្លួន​ស្គាល់​ជាមួយ​នឹង​ឧបករណ៍​បន្ថែមក្រៅ​ច្រើន ថែមទាំងអាចប្រើជាមួយនឹងឧបករណ៍ឥតខ្សែដោយប្រើប្រាស់ Bluetooth ទៀតផង តែវាបើកសិទ្ធិឲ្យតែឧបករណ៍ ដែល​សហការណ៍​​គ្នាជាមួយនឹង Microsoft ប៉ុណ្ណោះ ដែលអាចប្រើការជាមួយគ្នាបាន មានន័យថាបើប្រើក្ដារចុច  Mouse ឬឧបករណ៍​ផ្សេងៗ​ទៀត​ដូច​ជាកាសឥតខ្សែ ដែលពុំមាន Drivers នោះនឹងមិនអាចប្រើការបានដូចគ្នា បានជាដូច្នេះ​នៅពេល​គម្រោង​នេះ​ចេញ​ភាគ​ច្រើន​មានតែក្ដារចុច និង Mouse របស់ក្រុមហ៊ុន Razer ប៉ុណ្ណោះ ដែលអាចប្រើការបាន។