កំពូលឈីប CPU របស់ក្រុមហ៊ុន Qualcomm ដែល​ត្រៀម​ចេញ និង​ដំណើរការ​នៅ​លើ​ស្មាតហ្វូន​ពពួក Flagship ជា​ច្រើន​ម៉ាក និង​ម៉ូឌែល ប្រចាំ​ដើម​ឆ្នាំ 2018 នេះ នឹគឺជាកំណែ Update ធំមួយចេញពីឈីប Snapdragon 835 ដែលបានបំពាក់នៅលើស្មាតហ្វូនកំពូលៗជាច្រើនម៉ូឌែលចាប់តាំងពីដើមឆ្នាំ រហូត​ដល់​ចុងឆ្នាំ 2017 កន្លងទៅ។ វាគឺជារឿងសាមញ្ញទៅហើយនៅពេលឈីបស៊េរីថ្មីតែងតែខ្លាំងជាង​ឈីប​ស៊េរី​ចាស់ ហើយកាលពីម្សិលមិញនេះ ពិន្ទុ Benchmark របស់កំពូលឈីប Snapdragon 845 ត្រូវបានលាទត្រដាងហើយ។

យោងតាមប្រភពព័ត៌មានរបស់ PhoneArena បានចេញផ្សាយឲ្យដឹងថា Snapdragon 845 មិនត្រឹ​មតែ​ខ្លាំង​ជាងជំនាន់ចាស់នោះទេ ជុំវិញបច្ចេកទេសនៃការស៊ីថ្មគឺវាស៊ីតិចជាង Snapdragon 835 ដល់ទៅ 30% នេះដោយយោងតាមការអះអាងដោយផ្ទាល់ពី Qualcomm ក៏ដូចជាបច្ចេកវិទ្យាក្នុងការរក្សាកម្ដៅ ការគ្រប់គ្រងទៅលើដំណើរការរបស់ស្មាតហ្វូន គឺរឹតតែប្រសើរជាងមុនច្រើន។ ក្នុងនោះអ្វីដែលធ្វើឲ្យ Snapdragon 845 លេ​ចធ្លោគឺកម្លាំងក្រាហ្វិចរបស់ GPU Adreno 630 ថ្មី ដែលខ្លាំងជាងមុន ពិសេស​គឺវា​ខ្លាំងជាងក្រាហ្វិចរបស់ឈីប CPU A11 Bionic នៅលើ iPhone X ចន្លោះចាប់ពី 20-40% ឯណោះ​ក្នុង​ការ​អូសក្រាហ្វិចជាមួយកម្មវិធី និងការលេងហ្គេម ដូចរូបភាពមួយចំនួនខាងក្រោម។

ទោះបីជា GPU នៅលើ Snapdragon 845 ខ្លាំងជាងនៅលើ iPhone X ក្ដី ក៏ប៉ុន្តែសម្រាប់កម្លាំង CPU វិញ Snapdragon 845  នៅមិនអាចស៊ីដាច់ A11 Bionic របស់ Apple បាននៅឡើយនោះទេ មានន័យថាវានៅខ្សោយជាង បើទោះបីជាវាមាន 8 CPUs រត់ក្នុងល្បឿន1.8GHz និង 2.8GHz ក៏ដោយ។ ដូច្នេះយោងតាមពិន្ទុ Benchmark ដែលបានធ្វើតេស្ដដោយ ANANDTECH សបង្ហាញឲ្យឃើញថា Snapdragon 845 មាន GPU ខ្លាំង គឺខ្លាំងជាង GPU របស់ iPhone 8, 8 Plus និង X ទៅទៀត ដោយអំណោយផលសម្រាប់ការលេងហ្គេម ឬប្រើប្រាស់កម្មវិធីអូសក្រាហ្វិចធំៗជាដើម។

ដូច្នេះតើស្មាតហ្វូនដែលប្រើឈីបថ្មីនេះ នឹងមានលក្ខណៈសម្បត្តិពិសេសអ្វីខ្លះទៅ? នៅពេលដែល GPU របស់វាមានការរីកចំរើនលើសលុបបែបនេះ? យើងនឹងធ្វើតេស្ដដោយខ្លួនឯងផ្ទាល់នៅពេលឈីប​នេះ​ចេញ​លក់ជាមួយស្មាតហ្វូននាដើមខែមីនា ឬចុងខែក្រោយ!